'अंधेरी पश्चिम' परिसरातील ना. सी. फडके मार्गावरील अनधिकृत बांधकामांवर कारवाई

'अंधेरी पश्चिम' परिसरातील ना. सी. फडके मार्गावरील अनधिकृत बांधकामांवर कारवाई !

आतापर्यंत ७८ अनधिकृत बांधकामे तोडली, उर्वरित २० बांधकामांवर उद्या कारवाई

महापालिकेच्या 'के पश्चिम' विभागाची धडक कारवाई

बृहन्मुंबई महापालिकेच्या 'के पश्चिम' विभागातील ना. सी. फडके मार्गाच्या कडेला असणा-या अनधिकृत बांधकामांमुळे रस्ता रुंदीकरणासह पर्जन्यजल वाहिन्यांची कामे रखडलेली होती. यामुळे वाहतूकीला अडथळा येण्याबरोबरच पर्जन्यजल वाहिन्यांच्या कामातही अडथळा येत असल्याने या भागात पावसाचे पाणी साचण्याची शक्यता वाढलेली होती. परिमंडळ ४ चे उपायुक्त श्री. किरण आचरेकर यांच्या मार्गदर्शनाखाली या अनधिकृत बांधकामांवर धडक कारवाई करण्यात येऊन आतापर्यंत ७८ अनधिकृत बांधकामे हटविण्यात आली आहेत. तर उर्वरित २० बांधकामांवर दि. २३ सप्टेंबर रोजी कारवाई होणे अपेक्षित आहे, अशी माहिती 'के पश्चिम' विभागाचे सहाय्यक आयुक्त श्री. पराग मसुरकर यांनी दिली आहे.

के पश्चिम' विभागाचे सहाय्यक आयुक्त श्री. पराग मसुरकर यांनी दिलेल्या माहितीनुसार ना. सी. फडके मार्गांवरील अनधिकृत बांधकामांवर सप्टेंबर महिन्याच्या पहिल्या आठवड्यात सलग दोन दिवस कारवाई करण्यात आली होती. या कारवाई दरम्यान एकूण ६० अनधिकृत बांधकामे / अतिक्रमणे हटविण्यात आली होती. त्यांनतर आज दि. २२ सप्टेंबर २०१६ रोजी करण्यात आलेल्या कारवाई दरम्यान १८ अनधिकृत बांधकामे हटविण्यात आली आहेत. तर उर्वरित २० बांधकामे दि. २३ सप्टेंबर २०१६ रोजी निष्कासित करणे अपेक्षित आहे. यानुसार अंधेरी पश्चिम परिसरातील ना. सी. फडके मार्गावर असणा-या ९८ अनधिकृत बांधकामांपैकी ७८ बांधकामे तोडण्यात आली आहेत.

ना. सी. फडके मार्गावरील कारवाईसाठी मुंबई पोलीस दलाच्या अखत्यारितील डी. एन. नगर पोलिस ठाण्याचे वरिष्ठ पोलिस निरिक्षक श्री. धनाजी नलावडे व त्यांच्या ३४ जणांच्या चमूचे विशेष सहकार्य महापालिकेच्या पथकाला लाभले. या कारवाईसाठी २ जेसीबी, ३ डम्पर व २'लॉरी' वाहन वापरण्यात आले. सहाय्यक अभियंता (परिरक्षण) श्री. संजय बोरसे, दुय्यम अभियंता रमेश गिरगावकर व कनिष्ठ अभियंता विक्की शर्मा यांच्यासह महापालिकेच्या २५ जणांच्या चमूने ही कारवाई केली आहे, अशीही माहिती सहाय्यक आयुक्त श्री. पराग मसुरकर यांनी दिली आहे. या कारवाईमुळे ना. सी. फडके मार्गाच्या रुंदीकरणास तसेच रुंदीकरणाच्या खाली पर्जन्यजल वाहिन्यांची बांधकामे करण्यास मदत होणार आहे.